ബെംഗളൂരു : കർണാടകയിൽ ബൈക്ക് ടാക്സികളുടെ നിയമസാധുത സംബന്ധിച്ച് നിയമപോരാട്ടം തുടരുന്നതിനിടെ, ബെംഗളൂരുവിൽ പുതിയ ‘ബൈക്ക് ലിഫ്റ്റ്’ ഫീച്ചറുമായി റൈഡ്-ഹെയ്‌ലിംഗ് പ്ലാറ്റ്‌ഫോമായ റാപ്പിഡോ. സ്വന്തമായി ഇരുചക്രവാഹനമുള്ള യാത്രക്കാർക്ക് തങ്ങളുടെ യാത്രയ്ക്കിടയിൽ ഒപ്പം പോകുന്ന മറ്റ് യാത്രക്കാരെ പങ്കാളിയാക്കി ഇന്ധനച്ചെലവ് ലാഭിക്കാൻ സഹായിക്കുന്നതാണ് ഈ പുതിയ സംവിധാനം.
ആപ്പിൽ പ്രത്യക്ഷപ്പെടുന്ന നോട്ടിഫിക്കേഷൻ വഴിയാണ് റാപ്പിഡോ ഈ പുതിയ സേവനം ഉപഭോക്താക്കൾക്ക് പരിചയപ്പെടുത്തുന്നത്. ഇതിന്റെ പ്രവർത്തനം വിശദീകരിക്കുന്ന ഒരു ട്യൂട്ടോറിയൽ വീഡിയോയും ആപ്പിൽ ലഭ്യമാക്കിയിട്ടുണ്ട്. ഇരുചക്രവാഹനത്തിൽ യാത്ര ചെയ്യുന്ന വ്യക്തി തങ്ങളുടെ പുറപ്പെടുന്ന സ്ഥലവും ലക്ഷ്യസ്ഥാനവും ആപ്പിൽ രേഖപ്പെടുത്തുമ്പോൾ, ആ വഴിയിലുള്ള മറ്റ് യാത്രക്കാരുടെ റൈഡ് റിക്വസ്റ്റുകൾ ആപ്പ് കാണിച്ചുനൽകും. വലിയ ദൂരവ്യതിയാനമില്ലാതെ തന്നെ യാത്രക്കാരെ കയറ്റാനും ഇറക്കാനും ഇതിലൂടെ സാധിക്കും. യാതൊരുവിധ കമ്മീഷനും ഈടാക്കാതെ കിലോമീറ്ററിന് 5 രൂപ നിരക്കിൽ ഡ്രൈവർമാർക്ക് ഇതിലൂടെ വരുമാനം നേടാമെന്നും കമ്പനി വ്യക്തമാക്കുന്നു. നിലവിൽ പരീക്ഷണാടിസ്ഥാനത്തിൽ ബെംഗളൂരുവിലും മറ്റ് ചില പ്രധാന നഗരങ്ങളിലുമാണ് ഈ സേവനം ആരംഭിച്ചിട്ടുള്ളത്.
ആപ്പ് അധിഷ്ഠിത ബൈക്ക് ടാക്സികളുമായി ബന്ധപ്പെട്ട് സംസ്ഥാനത്ത് നിയമതർക്കം നിലനിൽക്കുന്നതിനിടയിലാണ് റാപ്പിഡോയുടെ ഈ പുതിയ നീക്കം. കഴിഞ്ഞ ജനുവരിയിൽ ബൈക്ക് ടാക്സികളുടെ പ്രവർത്തനം തടഞ്ഞ മുൻ ഉത്തരവ് കർണാടക ഹൈക്കോടതി റദ്ദാക്കുകയും നിലവിലുള്ള നിയമസംവിധാനത്തിന് കീഴിൽ ഇവയ്ക്ക് പ്രവർത്തിക്കാൻ അനുമതി നൽകുകയും ചെയ്തിരുന്നു. എന്നാൽ ഇതിനെതിരെ സംസ്ഥാന സർക്കാർ സുപ്രീം കോടതിയെ സമീപിച്ചിരിക്കുകയാണ്. കേസിൽ ഒക്ടോബർ 26-ന് സുപ്രീം കോടതി വാദം കേൾക്കും. കോടതിയുടെ തീരുമാനത്തിന്റെ അടിസ്ഥാനത്തിലായിരിക്കും വിഷയത്തിൽ തുടർനടപടികൾ സ്വീകരിക്കുകയെന്ന് ഗതാഗത വകുപ്പിലെ മുതിർന്ന ഉദ്യോഗസ്ഥർ അറിയിച്ചു.
